Muhammed Aliniň britaniýaly Genri Kupere garşy söweşdäki boks elligi onlaýn söwda çykaryldy. Bu barada Stuart Bull Auctions auksion öýi habar berýär diýip, RIA Nowosti belleýär.
Söweş 1963-nji ýylyň 18-nji iýunynda Londonyň “Uembli” stadionynda geçirildi we bäşinji raundda şol wagt Kassius Kleý ady bilen belli bolan Aliniň ýeňiş gazanmagy bilen tamamlandy.
Söwda çykarylan bu ellik Aliniň tälimçisi Anjelo Dandi tarapyndan döredilen deşik sebäpli boks taryhynda iň belli ellikleriň biri hasaplanylýar. Tälimçi täze ellik gözlenýänçä, Aliniň dördünji raunddaky nokdaundan soň özüni ele almagyna wagt utar ýaly ellikde eýýäm bar bolan deşigi giňeltdi.
Kuperiň awtografy bolan ellikde 2,5 sm uzynlykda deşik bar. BBC-niň maglumatlaryna görä, ol häzirki wagtda Kataryň şa maşgalasynyň agzasyna degişli. 31-nji oktýabrda tamamlanjak onlaýn söwdanyň dowamynda lotuň bahasynyň 8 mln ýewrodan geçmegine garaşylýar.
Muhammed Ali taryhda iň meşhur professional boksçylaryň biri, 1960-njy ýylyň Olimpiýa oýunlarynyň çempiony, agyr agramda absolýut dünýä çempiony (1964-1966, 1974-1978), bäş gezek “Ýylyň boksçysy” titulynyň we “Onýyllygyň boksçysy” adynyň eýesidir.
Karýerasyny tamamlandan soň, Ali Ýunisefiň hoşmeýilli ilçisi boldy (1998-2008). Ol karýerasynyň dowamynda 61 söweşe gatnaşyp, 56 ýeňiş gazandy (şolardan 37-si – nokaut arkaly).
