27-nji sentýabrdan 2-nji oktýabr aralygynda Demirgazyk ýarym şaryň ýaşaýjylary C/2023 A3 (Tsuchinshan-ATLAS) kometasyny ýaraglanmadyk göz bilen synlap bilerler. Live Science portalynyň berýän maglumatyna görä, kometa gündogarda birnäçe günläp, Gün dogmazyndan ýarym sagat öň çaglary görner.
Kometa iň ýokary ýagtylygyna 27-nji sentýabrda, öz orbitasynyň Güne iň ýakyn nokadyndan - perigeliýden geçende ýeter. Gözegçilik etmek üçin iň amatly günler 29-njy we 30-njy sentýabr, şonda kometa batyp barýan Aýyň inçe orak şekili goşular.
Ýaraglanmadyk göz bilen synlamak mümkin bolsa-da, astronomlar has aýdyň görmek üçin dürbi ýa-da teleskop ulanyp synlamagy maslahat berýärler. Kometanyň ýagtylygynyň nähili boljakdygyny öňünden aýtmak kyn, ýöne gijeki asmanda iň aýdyň görünýän 20 ýyldyz ýaly parlak bolmagy ähtimal.
30-njy sentýabrdan soň kometa demirgazyk giňişliklerinde görünmez, ýöne ekwatora golaý ýerde ýaşaýan adamlar ony 2-nji oktýabra çenli synlap bilerler. Şondan soň kometa Gün şöhleleriniň içinde ýitip gider.
C/2023 A3 kometasy ilkinji gezek 2023-nji ýylyň 9-njy ýanwarynda hytaýly astronomlar tarapyndan tapyldy. NASA 22-nji fewralda ATLAS ulgamyny ulanyp onuň açylandygyny tassyklady. Şeýle-de bolsa, bilermenler Günüň güýçli agyrlyk güýji sebäpli perigeliýadan geçende kometanyň ýok bolup biljekdigini duýdurýarlar, geçmişde beýleki kometalar hem şeýle bolupdy.
