Apple-iň öňki baş dizaýneri Joni Aýw OpenAI bilen täze emeli aň (AI) enjamyny döretmek üçin tagallasyny birleşdirdi. Heniz başlangyç tapgyrdaky bu taslama eýýäm maýadarlaryň ünsüni özüne çekdi we ýylyň ahyryna çenli 1 milliard dollara çenli serişde alyp biler diýip, PhoneArena ýazýar.
Taslamanyň maksady - adamyň emeli aň bilen özara gatnaşygynda öwrülişik etjek enjamy döretmek. Täze gajet çylşyrymly talaplary gaýtadan işlemek we wezipeleri adaty programma üpjünçiliginden has netijeli ýerine ýetirmek üçin generatiw AI-niň mümkinçiliklerini ulanar.
Taslamanyň jikme-jiklikleri gizlin saklanýar, ýöne Aýwyň toparynda Tena Tana we Ewans Henki ýaly, iPhone-nyň üstünde işlän Apple-iň öňki işgärleriniň bardygy mälim. Enjam Aýwyň esaslandyran LoveFrom kompaniýasy tarapyndan dizaýn edilýär.
Taslama hasaplaýyş enjamlarynyň täze synpynyň döremegine sebäp bolup biljek, AI-niň çägindäki ekspertizany we apparat üpjünçiligini birleşdirýär.
Taslama Aýwa we Emerson Collective - Loren Pauel Jobsyň kompaniýasy tarapyndan maliýeleşdirilýär. Taslamanyň topary häzirki wagtda 10 adamdan ybarat we San-Fransiskodaky meýdany 2973 inedördül metr bolan ofisde işleýär.
Joni Aýw Apple-de Stiw Jobs bilen onlarça ýyllap bile işledi. 90-njy ýyllaryň ahyrynda we 2000-nji ýyllaryň başynda özboluşly hem-de owadan enjamlardan başlap, häzirki minimalistik noutbuklara çenli, Apple-iň ajaýyp häzirki zaman enjamlarynyň köpüsiniň dizaýny bilen tanalýar. Aýwyň mirasy Apple-iň önümleriniň dizaýnynda öz beýanyny tapmagyny dowam etdirýär.
