Wengriýanyň paýtagty Budapeştde geçen 45-nji Bütindünýä küşt olimpiadasynyň çäklerinde Halkara küşt federasiýasynyň Baş assambleýasynyň mejlisi geçirildi. Duşuşykda Azerbaýjan tarapyndan küşt gurşawynda türki dilli döwletleriň arasyndaky hyzmatdaşlygy we gatnaşyklary berkitmek üçin ýörite gurluş döretmek teklip edildi.
Azerbaýjanyň Küşt federasiýasynyň baş sekretary Ilaha Gadimowa bu babatda çykyş edip, türki dilli ýurtlaryň bilelikdäki Assosiasiýasyny döretmegiň möhümdigini belledi we geljekki guramanyň esasy maksatlary barada habar berdi. FIDE-niň Baş assambleýasynda ses bermek üçin hödürlenen teklip biragyzdan kabul edildi.
Şeýlelikde, Türki dilli döwletleriň küşt assosiasiýasy döredildi. Assosiasiýanyň ilkinji agzalary Gazagystan, Azerbaýjan, Türkiýe, Özbegistan, Türkmenistan we Gyrgyzystan boldy.
Mejlisiň ahyrynda FIDE-niň prezidenti Arkadiý Dworkowiç Türki dilli döwletleriň küşt assosiasiýasyna agza döwletleriň küşt federasiýalarynyň ýolbaşçylary bilen duşuşdy.
Ýakyn günlerde assosiasiýanyň düzgünnamasy tassyklanar. Guramanyň ýolbaşçysy iki ýyl möhlet bilen saýlanar we ýolbaşçylyk nobatlaýyn tertipde alnyp barlar.
Belläp geçsek, FIDE-niň düzüminde Latyn Amerikasynyň ýurtlarynyň, arap döwletleriniň, fransuz dilli ýurtlaryň Küşt guramalary hereket edýär.
