EY Global Mobility Consumer Index kompaniýasynyň maglumatlaryna görä, dünýäniň gibridleri hem öz içine alýan elektromobil bazary 2024-nji ýylda, takmynan, 22% ýokarlanar. 2025-nji ýylda ýene 23% ösüşe garaşylýar diýip, “Interfaks” habar berýär.
2023-nji ýylda elektromobil bazary 29,7%, 2022-nji ýylda 37% ösdi. 2024-nji ýylda doly elektrik awtomobilleriň (BEV) satuwy 2022-nji ýyldaky 7,4 mln birlige garşy 11,2 mln birlik bolar diýlip çaklanylýar.
Şeýle-de, gözleg elektromobil satyn almaga bolan gyzyklanmanyň ýokarydygyny görkezdi. Geçen ýylky 55% bilen deňeşdirilende, sorag edilenleriň 58%-i şu ýyl BEV ýa-da gibrid satyn almagy meýilleşdirýär.
Şonuň bilen birlikde, gözleg sarp edijileriň isleginde üýtgeşmeleriň bolandygyny ýüze çykardy. ABŞ-da awtoulag satyn almak isleýänleriň paýy 60%-den 50%-e, şol sanda elektromobil satyn almak isleýänleriň paýy 48%-den 34%-e çenli azaldy.
Şol bir wagtyň özünde, aýratynam, Hytaýdan daşary hytaý elektromobilleriniň meşhurlygy artýar. Ýewropanyň elektromobil bazarynda olaryň paýy 2019-njy ýyldaky 0,4%-den 2023-nji ýylda 8%-e çenli ýokarlandy. Hytaý brendleriniň özüne çekijiliginiň esasy şerti olaryň baha we hil gatnaşygy boldy.
EY-nyň pikir soraşmasy 2024-nji ýylyň iýun – iýul aýlarynda 28 ýurtdan 19 müň sarp edijiniň arasynda geçirildi.
