Xiaomi kompaniýasy 2024-nji ýylyň awgust aýynda global smartfon satuwy boýunça Apple-den öňe geçip, ikinji orny eýeledi. Bu 2021-nji ýyldan bäri ilkinji şeýle üstünlikdir.
Counterpoint kompaniýasynyň maglumatlaryna görä, awgust aýy üçin häsiýetli bolan satuwyň umumy pese gaçyşy döwründe Xiaomi, aýratynam, Latyn Amerikasyndaky satuw çäreleriniň netijesinde ösüş gazanmagy başardy.
Onuň bu üstünligi täze önüm strategiýasy we Hindistan hem Günorta-Gündogar Aziýa ýaly esasy bazarlarda ornuny berkitmegi bilen baglanyşdyrylýar. Kompaniýa dürli baha segmentlerinde flagman gurluşlaryny çykarmaga ünsi jemledi, bu hem oňa diňe bir başlangyç we orta segmentlerde däl, eýsem premium segmentinde-de öz ornuny berkitmäge mümkinçilik berdi. Islegiň ösmeginde Redmi 13 we Note 13 ýaly 200 dollara çenli baha aralygynda gymmat bolmadyk modeller möhüm rol oýnady.
“Şu ýyl Xiaomi bir segmentde birnäçe gurluş çykarmagyň deregine her baha segmentinde belli bir flagman modelini döretmäge ünsi jemläp, has çeýe önüm strategiýasyny kabul etdi. Mundan başga-da, kompaniýa täze bazarlara çykmagyny dowam etdirmek we bar bolan bazarlarda ornuny berkitmek bilen, satuw we marketing tagallalaryny has işjeňleşdirdi” – diýip, kompaniýanyň gözlegler boýunça müdiri Tarun Pathak belledi.
Awgust aýynda Apple-iň satuwynyň peselmegi sentýabr aýynda täze iPhone modelleriniň çykmagyna garaşylmagy bilen baglanyşyklydyr. Kompaniýa iPhone 16-nyň relizinden soň ýene öňe çykyp biler.
