Amerikaly guwwaslar topary 1856-njy ýylda Atlantik ummanynda gark bolan fransuz Le Lyonnais gämisiniň galyndylaryny tapdy diýip, Phys.org ýazýar.
1855-nji ýylda gurlan we şol döwürde iň döwrebap hasaplanýan gämi Amerikanyň Adriatic ýelkenli gämisi bilen çaknyşmagyň netijesinde gark boldy. Gämi heläkçiliginde 114 adam heläk boldy.
Le Lyonnais gämisiniň gözleg işleri 20 ýyla golaý dowam etdi. Gäminiň galyndylary Massaçusets ştatynyň Nýu-Bedford şäherinden 200 km uzaklykda, Georges Bank diýlip atlandyrylýan sebitde tapyldy.
Le Lyonnais iňlis Laird & Sons gämi gurluşyk kompaniýasy tarapyndan Compagnie Franco-Americaine üçin guruldy. Ol ýolagçylary we poçtalary Atlantikanyň üstünden daşamak üçin ulanylýardy.
Heläkçilik 1856-njy ýylyň 2-nji noýabrynda, Le Lyonnais Nýu-Ýorkdan Gawra gaýdyp barýarka bolup geçdi. Adriatic-iň kapitany Jonatan Darem The New York Times gazetinde Le Lyonnais-yň dumanly gijede birden ugruny üýtgedendigini, bu bolsa çaknyşygy gutulgysyz edendigini habar beripdi.
Kapitanyň sözlerine görä, Adriatic ep-esli zyýan çekipdir, ýöne iki günden soň Massaçusets ştatynyň Gloster şäherine ýetip bilipdir. Emma Le Lyonnais-yňky ugruna bolmandyr. Birnäçe günden soň fransuz gämisi gark bolupdyr. Oňa uly zeper ýetipdir – gäminiň suw çyzygynyň deňinde bir deşik we ondan aşakda ýene biri emele gelipdir, ähtimal kömür bunkerleriniň golaýynda bolsa gerek. Diri galanlary başga bir gämi alyp gidipdir.
