Beýik Britaniýada şa aýaly Ýelizaweta II-niň hormatyna ýadygärlik açmak meýilnamalary tassyklandy. Heýkel Londondaky Sent-Jeýms seýilgähinde oturdylar diýip, Bi-Bi-Si habar berýär.
“Milli ýadygärlik paýtagtyň merkezinde – Sent-Jeýms seýilgähinde ýerleşer. Bu her bir adamyň merhum şa aýalyny hatyralap, gymmatly taryhymyz bilen tanşyp biljek ýeri bolar” – diýip, Beýik Britaniýanyň premýer-ministri Kir Starmer aýtdy, onuň sözleri kanselýariýasynyň habarynda getirilýär.
Ýadygärlik seýilgäh howzunyň üstünden geçýän köpriniň garşysynda, Bukingem köşgüne barýan Mell köçesiniň tarapynda ýerleşer. Bu ýer ýadygärligiň keşbini kesgitlejek ýörite komissiýa tarapyndan saýlandy.
Dizaýnerlerden we heýkeltaraşlardan teklipler 2024-nji ýylyň ahyrynda kabul edilip başlanar. Ahyrky taslamanyň 2026-njy ýylda, şa aýalynyň doglan gününiň 100 ýyllygyna çenli tassyklanmagyna garaşylýar.
Şeýle-de, hökümet Demirgazyk Irlandiýada, Uelsde we Şotlandiýada Ýelizaweta II-ä ýadygärlikleri gurmak üçin serişde bölüp berer. Şu ýylyň aprel aýynda Ýelizaweta II-niň daş-töweregi söýgüli korgi itleri bilen gurşalan iki metrlik bürünç heýkeli Okem şäherinde (Ist-Midlends sebiti) peýda boldy.
Ýatlap geçsek, Ýelizaweta II 2022-nji ýylyň 8-nji sentýabrynda 96 ýaşynda aradan çykdy. Ol Beýik Britaniýany 70 ýyl 7 aý dolandyryp, ýurduň taryhynda iň uzak höküm süren monarh boldy.
