AFK türkmen klublary üçin halkara ýaryşlaryna gatnaşmaga ygtyýarnamalaryň talaplaryny ýeňilleşdirdi.
Türkmenistanyň Futbol federasiýasynyň habar bermegine görä, 1-nji oktýabrda AFK-nyň ýaryşlarynyň 2025/26-njy ýyllardaky möwsümi üçin toparlara ygtyýarnama berlip başlanar. Şonuň üçin hem, Federasiýa ýerli klublary 2025-nji ýylda Türkmenistanyň Ýokary ligasyna we AFK-nyň ýaryşlaryna gatnaşmak üçin degişli ygtyýarnamalary almaga çagyrýar.
Öňümizdäki möwsümden başlap, Türkmenistanyň çempionatynyň Ýokary ligasynda çykyş etmäge ygtyýarnama almak üçin bildirilýän talaplar awtomatiki ýagdaýda AFK-nyň Çagyryş ligasy üçin hem degişli bolar. Şeýlelikde, 2025-nji ýylyň futbol möwsüminde Ýokary ligada gowy netije görkezen her bir topar goşmaça ygtyýarnama almasyzdan, AFK-nyň Çagyryş ligasyna hem gatnaşyp biler.
Häzirki wagtda Türkmenistanyň klublaýyn reýtingdäki orny AFK-nyň ikinji derejeli çempionlar ligasy bilen AFK-nyň Çagyryş ligasynyň her haýsyna bir topary ýollamaga mümkinçilik berýär.
Has ýokary derejeli yklym ýaryşlaryna gatnaşmak üçin (ACL Elite we ACL Two) klublar aýratyn ygtyýarnamany almaly bolarlar.
