YouTube-da kesgitli bir sesiň iPhone-niň dinamiklerinden (kolonkalaryndan) suwy aýryp biljekdigi baradaky wideo ýaýrady. Wideo 45 million gezek tomaşa edildi we bu usulyň netijeliligi barada jedeller gyzyşdy. The Verge-iň tehnologiýa synçysy Dewid Pirs ýegeni telefonyny derýa gaçyranyndan soň bu usuly barlap görmek kararyna geldi.
Öýde enjamy guradandan soň, Pirs "Sound To Remove Water From Phone Speaker (GUARANTEED)" diýip atlandyrylan wideony açdy we iPhone-yň ýene-de kadaly işläp başlandygyny gördi. Şeýle-de bolsa, munuň tötänlik hem bolup biljekdigini göz öňünde tutup, düşündiriş üçin Apple-e ýüz tutdy. Apple Watch-da suwy aýyrmak üçin şuňa meňzeş usulyň ulanylýandygyna garamazdan, Apple bu barada düşündiriş bermekden saklandy. Biraz soň Bose kompaniýasynyň bilermenleri belent sesli pes ýygylyklaryň hakykatdanam dinamiklerden suwy aýryp biljekdigini tassykladylar.
Goşmaça, iFixit-iň hünärmeni, iPhone 13-i hem goşmak bilen, dört smartfonda synag geçirdi. Sesiň dinamiklerden suw damjalaryny çykaryşyny wideo ýazga geçirdi. Bu usul täsirli bolup çykdy, ýöne onuň kömegi bilen telefonyň beýleki böleklerinden däl-de, diňe dinamiklerden çyglylygy aýryp bolýar.
