Italiýaly Andrea Kimi Antonelli 2025-nji ýylda “Formula-1-iň” “Mersedes” toparynyň esasy ýaryşa gatnaşyjysy bolar. Bu barada toparyň saýtynda habar berilýär.
18 ýaşly Antonelli “Mersedesde” “Formula-1-iň” ýedi gezek çempiony britaniýaly Lýuis Hemiltonyň ornuny eýelär. Hemilton indiki möwsümden “Ferraride” çykyş eder. Antonelli britaniýaly Jorj Rasselliň ýoldaşy bolar.
Italiýaly 2019-njy ýyldan bäri “Mersedesiň” ýaşlar akademiýasynyň gatnaşyjysydyr. Ol häzirki möwsümde “Formula-2-de” ilkinji gezek çykyş etdi, 18 ýaryşda iki ýeňiş gazandy we häzir umumy sanawda altynjy orny eýeleýär.
Rassell 2019-njy ýylda “Mersedes” akademiýasyndan soň “Formula-1-e” geçdi. Şondan bäri iki gezek Gran-pride ýeňiji boldy we 13 gezek münbere çykdy.
Häzirki möwsümde 18 tapgyrdan soň Hemilton umumy sanawda altynjy, Rassell sekizinji orny eýeleýär. Konstruktorlaryň kubogynda “Mersedes” dördünji orunda ýerleşýär.
