NASA-nyň Dimorf asteroidiniň ugruny üýtgetmek boýunça üstünlikli geçen missiýasy netijesinde Ýer täze meteor akymynyň döreýşine şaýat bolup biler. Milanyň Politehniki institutynyň barlagçylary Italiýanyň CubeSat hemrasyndan alnan maglumatlara esaslanyp, DART zondunyň asteroid bilen çaknyşmagy netijesinde emele geljek millionlarça bölejikleriň hereketini simulasiýa etdiler diýip, Science Alert habar berýär.
Ilkinji bölejikleriň sekuntda 1,5 kilometrden gowrak tizlik bilen (sagatda 5400 kilometr) hereket edip, ýedi ýylyň içinde Ýere gelip ýetjekdigi çak edilýär. Şeýle-de bolsa, galyndylaryň köpüsi biraz gijiräk, takmynan, 30 ýyldan soň planetamyza gelip ýeter. Hatda iň uly bölekleriň hem atmosferada ýanmagyna we asmanda ýagty çyzyklaryň döremegine garaşylýar.
Perseidler ýaly, täze “Dimorfidler” meteor akymyny görmek mümkinçiligi entek tassyklanmasa-da, alymlar ony ýakyn onýyllyklarda tassyklamaga umyt baglaýarlar. Gözegçilikleriň netijeleri DART missiýasynyň netijeliligine baha bermäge we asteroidleriň özüni alyp barşy barada täze maglumatlary almaga mümkinçilik berer.
