Hytaýyň metbugatynda we sosial ulgamlarda Xiaomi-niň awtoulag bölüminiň çeken ýitgileri barada jedeller gyzyşýar: ikinji çärýek üçin maliýe hasabaty çap edilenden soň, kompaniýanyň her Xiaomi SU7 elektrik sedanynda, takmynan, 10 müň dollar ýitirýändigi ýüze çykdy.
Ikinji çärýekde kompaniýa jemi 27 307 Xiaomi SU7 awtoulagyny müşderilere gowşurdy hem-de 6,4 milliard ýuan girdeji gazandy we arassa 1,8 milliard ýuan ýitgi çekdi. Görnüşi ýaly, Xiaomi SU7-iň ortaça bahasy 234 müň ýuana (33 müň dollar), her ulag satylanda ortaça ýitgi bolsa 65 müň ýuana (9,1 müň dollar) deň.
Jedellere jogap hökmünde Xiaomi-niň başlygy we awtoulag bölüminiň kuratory Leý Szun (Lei Jun) özüniň Weibo-daky sahypasynda şeýle diýip ýazdy: “Awtoulag döretmek kyn, ýöne üstünlik ajaýyp bolmaly! Xiaomi Auto henizem maýa goýum tapgyrynda, her kim muňa düşüner diýip umyt edýärin".
Aslynda, Leý Szun uly ýitginiň çekilendigini we söwda-da zelel görlendigini boýun aldy. Xiaomi Group-yň başlygy Lu Weýbing (Lu Weibing) hem munuň sebäbini aýdyňlaşdyrdy. Onuň sözlerine görä, Xiaomi SU7-iň önümçiliginiň pesligi we maýa goýum çykdajylarynyň köplügi sebäpli, taslama entek girdejili däl. Emma, baş müdiriň çaklaýşyna görä, wagtyň geçmegi bilen hemme zat üýtgär we Xiaomi ahyrsoňy awtoulag satuwyndan girdeji gazanyp başlar.
