2030-njy ýylda geçiriljek futbol boýunça dünýä çempionaty üçin Marokkoda äpet çadyr görnüşindäki stadiony gurmak meýilleşdirilýär. Grand Stade Hassan II arenasy 115 müňden gowrak tomaşaçyny kabul edip biler diýip, “Wokrug sweta” neşiri habar berýär.
Taslama Parižiň Populous we Oualalou + Choi binagärlik býurolary tarapyndan işlenip düzüldi. Arena Kasablankanyň demirgazygyndaky El Mansuriýada 100 gektar meýdanda ýerleşer.
Çadyr görnüşli dizaýny döretmekde binagärler Marokkanyň däplerinden ylham aldylar. Stadionyň üçegi 32 merdiwan halka daýanýan alýumin gözeneklerden ýasalar. Münberler umumy zolaga we VIP bölüme bölner.
Şeýle hem “oazis” effektini döredýän, 28 metr beýiklige galdyrylan meýdançalarda ýerleşjek köp derejeli baglar bolar. Birinji gatda botanika bagynyň bolmagy meýilleşdirilýär.
Sebitdäki Populous-yň dolandyryjy direktory Kristofer Li: "Stadion Marokko we tutuş futbol pudagy üçin hakykatdanam ajaýyp medeni ýer, dünýädäki iň uly stadionlaryň biri bolar" – diýmek bilen, arenanyň FIFA-nyň talaplaryna doly laýyk gelýändigini we Dünýä çempionaty-2030-y kabul edip biljekdigini aýdyp, sözüniň üstüni ýetirdi.
Geljekki dünýä çempionatynyň soňky duşuşygynyň nirede geçiriljekdigi entek belli däl. Dalaşgärleriň biri - Madridiň “Real”-ynyň öý stadiony, ýaňy-ýakynda durky täzelenen “Santýago Bernabeu”.
