Ýagşygeldi Kakaýew adyndaky Halkara nebit we gaz uniwersitetiniň talyplary we mugallymlary Malaýziýanyň «PETRONAS» kompaniýasynyň Tehnologiýalar uniwersitetinde okuw-önümçilik tejribeliklerini geçýärler.
"Türkmenistan" gazetinde habar berlişi ýaly, bu okuw-tejribeligi türkmen ýokary okuw mekdebiniň «PETRONAS» kompaniýasynyň Tehnologiýalar uniwersiteti bilen baglaşylan özara düşünişmek hakynda Ähtnamasynyň çäginde amala aşyrylýar.
Baglaşylan Ähtnamanyň çäginde şu aýyň dowamynda Halkara nebit we gaz uniwersitetiniň talyplarynyň 5-si iki hepdelik önümçilik tejribeligini, üç sany mugallymy bolsa bir hepdelik hünär derejesini ýokarlandyryş okuwlaryny geçmäge mümkinçilik aldy.
Saparyň çäginde Petronas tehnologiýalar uniwersitetiniň professor-mugallymlary we hünärmenleri bilen duşuşyklar geçirildi. HNGU-nyň mugallymlary bu bilim ojagynda okuw, ylmy-barlag işleriniň alnyp barlyşy bilen tanyşdyryldy. Bu ýerde bolmagyň çäginde talyplardyr mugallymlar «PETRONAS» kompaniýasynyň önümçilik desgalaryna, dolandyryş edaralaryna hem baryp görerler.
