Hytaýyň Çendu şäheriniň asmanynda ýaşaýjylar tarapyndan “ýedi Gün” diýlip at berlen seýrek optiki hadysa bolup geçdi. Bu barada World of Buzz ýazýar.
Bir minutyň içinde megapolisiň üstünde dürli ýagtylykda we reňk temperaturasynda bolan ýedi sany “Gün” görnüp, özboluşly görnüşi döretdi.
Şaýatlaryň aýtmagyna görä, olar şeýle hadysa ilkinji gezek syn edýärler. Hadysa bir minut töweregi dowam etdi, şondan soň diňe bir Gün – hakyky Gün galdy.
Astronomiýa muşdaklarynyň Syçuan jemgyýetiniň wise-prezidenti Szen Ýan bu optiki illýuziýanyň köp gatlakly aýnadan şöhläniň döwülmegi we serpikmegi netijesinde ýüze çykandygyny düşündirýär.
“Aýnanyň her bir goşmaça gatlagy ýene bir wirtual şekili döredýär. Hatda käwagt şol bir aýna bilen wirtual şekilleriň sany syn ediş burçuna görä üýtgäp biler” – diýip, ol belledi.
