Germaniýaly futbolçy Ilkaý Gündogan “Barselonadan” “Mançester Sitä” geçdi diýlip, iňlis klubunyň saýtynda habar berilýär. Şertnama bir möwsüm hereket eder.
“Bu ýere gaýdyp gelmek mümkinçiligi köp zady aňladýar. Hemmeler meniň Gwardiola nähili hormat goýýandygymy bilýär – ol dünýäde iň gowy tälimçi we her gün onuň bilen işleşmek seni iň gowy oýunça öwürýär. Sen hemişe öz öňüňde synag görýärsiň, bu hem seniň ussat hökmünde isleýän zadyň. Men onuň bilen ýene işleşmäge sabyrsyzlyk bilen garaşýaryn” – diýip, germaniýaly futbolçy aýtdy.
Gündogan 33 ýaşynda, ol “Barselona” 2023-nji ýylda geçdi. Toparyň düzüminde 51 oýna gatnaşyp, bäş gol geçirdi.
Gündogan 2016-njy ýyldan “Mançester Sitide” oýnady. Toparyň düzüminde bäş gezek Angliýanyň çempiony boldy, iki gezek Angliýanyň Kubogyny we Superkubogyny, dört gezek Angliýanyň ligalarynyň kubogyny we bir gezek Çempionlar ligasyny utdy. Şeýle-de, ýarymgoragçy “Nýurnberg” nemes topary we Dortmundyň “Borussiýasy” üçin çykyş etdi. Germaniýanyň milli ýygyndysynyň düzüminde Ýewropa çempionatynyň ýarym finalyna çykdy.
