Saud Arabystanynyň Superkubogy ugrundaky oýunda “Al-Hilýalyň” futbolçylary Kriştianu Ronaldunyň çykyş edýän topary bolan “Al-Nasry” uly ýeňlişe sezewar etdiler. Oýun şenbe güni Abhada geçirildi we ýurduň häzirki çempionynyň peýdasyna 4:1 hasabynda tamamlandy.
Ronaldu 44-nji minutda hasaby açdy, ýöne şondan soň “Al-Nasr” dört goly sypdyrdy. “Al-Hilýaldan” serbiýaly futbolçylar Sergeý Milinkowiç-Sawiç (55-nji minut), Aleksandr Mitrowiç (64-nji we 69-njy minutlarda iki gol) we braziliýaly Malkom (72) tapawutlandy. Bu ýeňiş “Al-Hilýala” taryhda bäşinji we yzygider ikinji Saud Arabystanynyň Superkubogyny getirdi.
Oýun wagty Ronaldu öz ýoldaşlaryna nägilelik bildirdi – ol merkezi halkada durup, hereket bilen olaryň meýdançada uklaýandygyny görkezdi. Oýun gutarandan soň 39 ýaşly hüjümçi sylaglama dabarasyna gatnaşmakdan we kümüş medal almakdan ýüz öwürdi. Portugaliýaly ahyrky jürlewükden soň derrew meýdançany terk etdi.
Mundan başga-da, oýundan öň Ronaldu futbolçylaryň däbini bozdy, ol meýdança çykanynda kubogy elledi. Türgenleriň arasynda şeýle hereket kubogy garşydaşyň aljakdygyny aňladýan ýaramaz alamat hasaplanylýar.
