Meksikanyň Saýlaw kazyýeti Klaudiýa Şeýnbaumyň 2-nji iýunda geçirilen Prezident saýlawlarynda gazanan ýeňşini biragyzdan tassyklady. Kazyýetiň X sosial ulgamyndaky sahypasynda ýaýlyma berlen mejlisiň dowamynda kazyýetiň başlygy Monika Soto Fregoso “Taryhy döretmegi dowam edeliň” koalisiýasy tarapyndan hödürlenen Şeýnbaumyň sesleriň aglaba köplügini alandygyny tassyklady diýip, TASS habar berýär.
Kazyýet saýlawlary hakyky we konstitusion hem hukuk ýörelgelerine laýyk gelýär diýip ykrar etdi.
“Klaudiýa Şeýnbaum Pardo Meksikanyň Birleşen Ştatlarynyň ilkinji saýlanan zenan Prezidenti diýlip yglan edilýär, ol bu wezipäni 2024-nji ýylyň 1-nji oktýabryndan 2030-njy ýylyň 30-njy sentýabryna çenli eýelär” – diýip, Saýlaw kazyýetiniň başlygy belledi. Şeýle-de, ol penşenbe güni dabaraly ýagdaýda Şeýnbauma Meksikanyň saýlanan Prezidentiniň şahadatnamasynyň gowşuryljakdygyny aýtdy.
Meksikanyň Milli saýlaw komitetiniň maglumatlaryna görä, Şeýnbaum saýlawçylaryň 59,76% sesini aldy. Onuň ýakyn bäsdeşi Soçitl Galwes 27,45%, Horhe Alwares Maýnes bolsa 10,32% ses aldy.
