"Altyn asyr" futbol kluby 2024/25 möwsüm üçin AFK-2 Çempionlar ligasynyň saýlama duşuşygynda myhmançylykda "Ist Bengal" hindi klubundan üstün çykdy. Kalkuttada geçirilen duşuşyk türkmen klubunyň peýdasyna 3:2 hasabynda tamamlandy.
"Altyn asyryň" düzüminde gollary Myrat Annaýew (18-nji minut), Selim Nurmyradow (28) we Mihail Titow (52) geçirdi. Bu ýeňiş Ýazguly Hojageldiýewiň şägirtlerine ýaryşyň toparlaýyn tapgyrynda çykyş etmäge hukuk berdi.
Türkmen klubunyň toparlaýyn tapgyryndaky garşydaşlary 16-njy awgustda Kuala-Lumpurda geçiriljek bije çekişlikde belli bolar. Topar dördünji sebede düşýär.
Belläp geçsek, şu möwsümden başlap, Aziýa futbol konfederasiýasy (AFK) klublaýyn ýaryşlaryny UEFA-nyň ulgamyna meňzeş täze formatda geçirip başlaýar (Çempionlar ligasy, Ýewropa ligasy we Konferensiýalar ligasy). Indi Aziýada hem üç ýaryş geçiriler:
- AFK-nyň Ýokary Çempionlar ligasy (AFC Champions League Elite, gysg. ACL Elite) 24 klub gatnaşýar.
- AFK-2 Çempionlar ligasy (AFC Champions League Two, gysg. ACL Two), 32 klub gatnaşýar.
- AFK Çagyryş Kubogy (AFC Challenge League) 18 klub gatnaşýar.
Türkmenistanyň Futbol federasiýasynyň resmi saýtynda habar bermegine görä, ýurdumyzyň futbol boýunça Ýokary ligasynda çykyş edýän klublaryň bäşisi Aziýanyň Futbol Konfederasiýasynyň 2024/2025 möwsümlerinde geçiriljek kuboklarynda çykyş etmäge mümkinçilik berýän AFK-nyň ygtyýarlandyrmasyny üstünlikli geçdiler.
AFK-nyň ikinji derejeli bäsleşigi bolan “Çempionlar ligasy – 2” bäsleşiginiň ygtyýarlandyrmasyny “Altyn Asyr” hem-de “Ahal” toparlary üstünlikli geçdiler. “Arkadag”, “Aşgabat” “Nebitçi” toparlary bolsa AFK-nyň “Çagyryş Kubogy” bäsleşiginiň ygtyýarlandyrmasyny üstünlikli tabşyrdylar.
