Dört gezek Olimpiýa çempiony we Milli basketbol assosiasiýasynyň (MBA) iki gezek çempiony Kewin Dýurant Fransiýanyň “Pari Sen-Žermen” futbol klubunyň paýdary boldy. Bu barada basketbolçynyň esaslandyran Boardromm kompaniýasynyň X sosial ulgamyndaky sahypasyna salgylanyp, RIA Nowosti habar berýär.
Bellenilişi ýaly, Dýurant we onuň işewür hyzmatdaşy Riç Kleýman “PSŽ-niň” sport bazasyna baryp görenlerinde, “sport we maýa goýum nukdaýnazaryndan uly gyzyklanma döredýän ugurlara – zenanlar we ýaşlar toparlaryna aýratyn üns berýärler”.
“Dýurant bilen Kleýmanyň sport-güýmenje media ulgamy Boardromm “PSŽ” bilen bilelikde mazmun we meýilnamalaşdyryş ugurlaryny öz içine alýan köpugurly hyzmatdaşlygy ösdürmek üçin işleşer” diýlip, guramanyň beýanynda aýdylýar.
Forbes žurnaly boýunça, Dýurant iň ýokary hak alýan türgenleriň onlugyna girýär, onuň baýlygy 2023-nji ýylda 89,1 mln dollar diýlip hasaplandy.
Päriždäki Oýunlaryň jemi boýunça, Dýurant sportuň toparlaýyn görnüşinde dört Olimpiýa altyn medalyny alan ilkinji erkek türgen boldy. Oýunlaryň basketbol ýaryşynyň finalynda amerikalylar Fransiýanyň toparyny 98:87 hasabynda utup, yzygider bäşinji gezek altyn medalyň eýeleri boldular.
