Foxconn kompaniýasy iPhone 16 smartfonlarynyň köpçülikleýin önümçiligine girişdi. Bu barada Gizmochina portaly habar berýär.
iPhone 16 üçin komponentleriň önümçiligi gurluşlaryň durnukly ýygnalyşyny üpjün etmek üçin öňünden başlady. Displeý panelleriniň köpçülikleýin önümçiligi heniz iýun aýynda başlandy we olar sentýabr aýyndaky önümçilige goýberiş üçin ýeterlik mukdarda öndürildi.
iPhone 16 smartfonlary üçin OLED displeýlerini Samsung Display we LG Display öndürýär. 2024-nji ýylyň ahyryna çenli Samsung bilen LG Apple-e, degişlilikde, 80 mln we 43 mln töweregi ekran iberer.
Öňki gürrüňlere görä, iPhone 16 seriýasy has inçe çarçuwalara eýe bolar. Pro modelleriniň iPhone 15 Pro we iPhone 15 Pro Max bilen deňeşdirilende uly displeýler bilen üpjün edilmegine garaşylýar. Şeýlelikde, iPhone 16 we iPhone 16 Pro Max, degişlilikde, 6,3 we 6,9 dýuým ekranlara, kiçi modeller bolsa 6,1 we 6,7 dýuým ekranlara eýe bolar.
Apple kompaniýasy iPhone 16 seriýasynyň global üpjünçiligi üçin maksatly görkezijisini öňki iPhone 15 seriýasy bilen deňeşdirilende, 10% - 90 mln gurluşa çenli artdyrdy.
Belläp geçsek, iPhone 16 smartfonlarynyň resmi tanyşdyrylyşy şu ýylyň sentýabr aýynda bolar, käbir maglumatlara görä, ol 10-njy sentýabrda geçiriler.
