Awgust aýynyň başynda Puerto-Rikonyň ýaşaýjylary seýrek atmosfera hadysasynyň – ýokarlygyna urýan, äpet “gyzyl spraýt” ýyldyrymyň çakyşynyň şaýady boldular. Karib deňziniň astronomiýa jemgyýetiniň gözegçilik kameralary ajaýyp pursady dürli tarapdan surata alyp ýetişdi diýip, Gizmodo ýazýar.
“Gyzyl spraýtlar” – bu ýyldyrym çakýan mahaly atmosferanyň ýokarky gatlaklarynda ýüze çykýan seýrek atmosfera razrýadlarydyr. Olar gyzyl reňki bilen tapawutlanýar we beýikligine 90 kilometre ýetip bilýär. Şeýle razrýadyň intensiwligi adaty ýyldyrymdan 10 esse güýçli hasaplanýar.
"Gyzyl spraýtlaryň" peýda bolmagy belli bir atmosfera şertleri, şol sanda atmosferanyň gatlaklarynyň arasyndaky temperaturanyň we elektrik potensialynyň tapawudy bilen baglanyşyklydyr.
Bu hadysanyň seýrek bolýandygyna garamazdan, 2021-nji ýylda Puerto-Rikoda ony eýýäm kamera düşürip ýetişdiler - suratçynyň obýektiwine düşen “gyzyl spraýtyň” suraty tutuş dünýä ýaýrady.
