Argentinanyň milli ýygyndysynyň düzüminde futbol boýunça dünýä çempiony Anhel Di Mariýa Portugaliýanyň “Benfika” kluby bilen şertnamasyny uzaltdy. Bu barada toparyň saýtynda habar berilýär.
Ýarym goragçy “Benfika” 2023-nji ýylyň iýul aýynda erkin agent hökmünde geçdi we klub bilen birýyllyk şertnama baglaşdy. 2023/24 möwsüminde Di Mariýa 48 oýna gatnaşyp, 17 gol geçirdi we 15 netijeli geçirim bilen tapawutlandy. 36 ýaşly oýunçynyň täze şertnamasy 2024/25 möwsüminiň ahyryna çenli hereket edýär.
Di Mariýa “Benfikada” 2007 – 2010-njy ýyllarda hem çykyş etdi we topar üçin 121 oýna gatnaşyp, 15 gol geçirdi. Soňra futbolçy Madridiň “Realynda” (2010-2014), Angliýanyň “Mançester Ýunaýtedinde” (2014-2015), Fransiýanyň “Pari Sen-Žermeninde” (2015-2022) we “Ýuwentusda” (2022-nji ýylyň tomsundan) oýnady.
