Samsung elektromobiller üçin innowasion çekiş akkumlýatoryny hödürledi. Akkumulýator Seulda geçirilen SNE Battery Day 2024 sergisinde tanyşdyryldy diýip, Gizmochina ýazýar.
Täze batareýanyň täsir galdyryjy aýratynlyklary bar: bir zarýadda 965 km ýol geçjek ýöreýiş ätiýaçlygy, bary-ýogy 9 minut zarýad alyş wagty we 20 ýyla çenli hyzmat möhleti.
Samsung-yň BYD we CATL ýaly kompaniýalar bilen bäsleşmeýändigine garamazdan, kompaniýa öz batareýalaryny işjeň ösdürýär. Täze batareýa elektromobillerde giňden ulanylýan adaty litiý-ion batareýalaryndan has ýeňil, kiçi we has ygtybarlydyr.
Kompaniýada aýdylmagyna görä, batareýa “super-premium” elektromobillerinde ulanylar, bu bolsa onuň bahasynyň gymmatdygyny görkezýär. Häzirki wagtda batareýanyň nusgalary, synagdan geçirmek üçin, awtoulag öndürijilerine berildi. Akkumulýatoryň köpçülikleýin önümçiligini 2027-nji ýylda başlamak meýilleşdirilýär.
Bu taslama alyjylar üçin elektromobilleriň özüne çekijiligini ep-esli artdyrar.
