Karnegi Mellon uniwersitetiniň alymlary ýüplükden çydamly üç ölçegli örülen önümleri döredip biljek "doly örme" tehnologiýasyny döretdiler. Enjamyň prototipi ýüplükden örülen gatlak döredip, 3D printer ýaly işleýär.
Enjam kese we dik hatarlary döretmek üçin materialy dolandyrýan ujy gaňyrçakly iňňeleri ulanýar. Netijede, 3D printerde çap edilen görnüşe eýe bolan, çydamly önüm emele gelýär.
Tehnologiýanyň esasy artykmaçlygy, materialy gaýtadan ulanmak mümkinçiligidir. Adaty 3D printerde çap edilen obýektlerden tapawutlylykda, örülen önümi aňsatlyk bilen çözüp we täzeden örüp bolýar.
Häzirki wagtda prototip galyň örme ýüpi bilen işleýär, ýöne işläp düzüjiler inçe ýüplükden hem önümleri döretmek üçin enjamyň funksiýalaryny kämilleşdirmegi meýilleşdirýärler. Bu bolsa ýumşak, şekilini aňsat üýtgedip bolýan, şol bir wagtyň özünde plastik ýaly berk önümi döretmäge mümkinçilik berer.
Geljekde oturgyçlar ýa-da kürsüler ýaly çylşyrymly önümleri döretmäge ukyply enjam döretmek meýilleşdirilýär. Işläp düzüjiler “doly örme” tehnologiýasynyň egin-eşik we beýleki önümleri öndürmek üçin täze mümkinçilikleri döredip biljekdigine ynanýarlar.
