Meta, ulanyjylara Instagram-da we web interfeýsde öz wirtual nusgalaryny döretmäge mümkinçilik berýän täze AI Studio guralyny hödürledi. Indi blogerler we iş sahypasynyň eýeleri abunaçylar bilen söhbetdeşliklerde we teswirlerde aragatnaşyk gurmak üçin emeli aňy ulanyp bilerler, diýip 3DNews ýazýar.
AI Studio-ny web interfeýsi arkaly ýa-da Instagram-da “AI bilen hat alyşmagy” başlap, işledip bilersiňiz.
Ulanyjylar bu gurala öz mazmunyny öwredip, gaça durmaly temalary we paýlaşyp bolýan salgylanmalary sazlap bilerler. Guralda awtomatiki jogap we haýsy hasaplar bilen aragatnaşyklara rugsat berilýändigini kesgitlemek funksiýasy bar. Mundan başga-da, AI Studio-da beýleki ulanyjylar bilen aragatnaşyk saklamak üçin Meta programmalarynda we OpenAI dükanynda ýerleşdirilip bilinjek täze AI-adamy döredip bolýar.
Meta, ulanyjylaryň wirtual nusgalarynyň garaşylmadyk pikirleri beýan edip biljekdigini mälim etdi. Şonuň üçin, berlen jogabyň AI profiliňkidigi anyk görkeziler. Kompaniýa AI profilini döretmek boýunça görkezmeleri çap etdi, gadagan temalary saýlamakda AI-adamy döredýän ulanyjynyň jogapkärdigini nygtady.
Bu funksiýanyň beýleki sebitlerde haçan elýeterli boljakdygy entek belli däl.
