Boeing-iň täze baş müdiri wezipesine 64 ýaşly Kelli Ortberg bellendi. Ol 8-nji awgustda öz wezipe borçlaryny ýerine ýetirmäge girişer. Ortberg bu wezipede mart aýynda işden çekilýändigini habar beren Deýw Kalhunyň ornuny eýelär diýip, Forbes habar berýär.
Ýolbaşçylygyň üýtgemegi awiaöndürijiniň birnäçe meseleler, şol sanda paýnamalaryň bahasynyň pese gaçmagy we ikinji çärýekde ýitgiler bilen ýüzbe-ýüz bolan döwri bolup geçýär. 2024-nji ýylda Boeing-iň paýnamalary 27% arzanlady, bu bolsa 2020-nji ýyldan bäri iň ýaramaz görkezijidir. Kompaniýa iki sany heläkçilige we uçuşlaryň uzak wagtlap togtadylmagyna sebäp bolan Boeing 737 MAX uçarlary bilen çynlakaý kynçylyklara sezewar boldy.
Muňa garamazdan, kompaniýa 2024-nji ýylyň ahyryna çenli 737 MAX modelleriniň önümçiligini aýda 38 uçara we 787 Dreamliner-iň önümçiligini aýda 5 uçara çenli artdyrmagy meýilleşdirýär diýip, Bloomberg ýazýar.
2020-nji ýyldan Boeing-e ýolbaşçylyk eden Kalhun 2025-nji ýylyň mart aýyna çenli kompaniýada ýörite geňeşçi hökmünde işlemegini dowam eder. Ol ençeme aý maýadarlara, awiakompaniýanyň müşderilerine we giň köpçülige Boeing-iň hil bilen bagly köp sanly meseleleri berk gözegçilik astyna aljakdygyna wada berdi diýip, CNBC belleýär.
Ortbergiň wezipä bellenmegi Boeing kompaniýasyna bar bolan meselelerden baş çykarmaga we maýadarlaryň hem müşderileriň ynamyny gaýtadan dikeltmäge kömek eder diýlip garaşylýar.
