Mitsubishi Motors Honda we Nissan-yň bileleşigine goşulyp, ýapon awtoulag öndürijileriniň täze toparyny döreder. Bu barada Nikkei Asia çeşmelere salgylanyp habar berýär.
Mitsubishi bu karary hytaý awtoulag öndürijileriniň bäsdeşliginiň artmagy esasynda aldy. Täze bileleşigiň çäginde kompaniýalar programma üpjünçiligini ösdürip, geljekde awtoulag öndürmegi meýilleşdirýärler.
Nissan we Honda-yň arasynda bileleşigiň döredilmegi şu ýylyň mart aýynda yglan edilipdi. Kompaniýalar elektromobilleri we akylly tehnologiýalary ösdürmekde hyzmatdaşlygy maksat edindiler.
Mitsubishi Motors eýýäm Renault-Nissan-Mitsubishi bileleşiginiň düzümine girýär. Mitsubishi Motors-yň paýnamalarynyň 34%-i Nissan-a degişlidir.
Nissan dünýä satuwlarynyň ýarysyny emele getirýän ABŞ we Hytaý bazarlaryndaky paýyny yzygiderli ýitirýär. Birinji çärýegiň ahyrynda kompaniýa uly arzanlaşyklar sebäpli ABŞ-da hiç hili girdeji gazanyp bilmedi. Şonuň üçin kompaniýa maliýe netijeleri baradaky ýyllyk çaklamasyny täzeden gözden geçirmeli boldy. Hytaýda bolsa, kompaniýa zawodlarynyň birini ýapmaga mejbur boldy.
Mitsubishi Motors hem GAC bilen bilelikdäki kärhanany terk edip, Hytaý bazaryndan doly çykdy.
