Xiaomi täze planşeti bolan Redmi Pad SE 4G-ni dünýä bazaryna çykarjakdygyny yglan etdi. Bu enjam Apple-iň iPad mini planşetine jogap hökmünde seriýadaky iň ykjam enjamdyr.
Planşetiň displeýiniň diagonaly 8,7 dýuým, ölçegleri – 211,6 x 125,5 x 8,8 mm, agramy – 370 gr. Bu aýratynlyklar planşeti kiçijik torbada götermäge mümkinçilik berýär.
Redmi Pad SE 4G-niň 1340x800 piksel durulykda, 90 Gs täzelenme tizligi we 600 nit ýagtylygy bolan IPS ekrany bar. Enjamyň esasy aýratynlygy 4 GB operatiw ýady we 64 ýa-da 128 GB hemişelik ýady bilen bilelikde işleýän MediaTek Helio G85 prosessorydyr. Kuwwatlylygy 6650 mAs bolan batareýa 10W simli zarýad bermegi goldaýar.
Kameralar – esasy 8 Mp we öň tarapky 5 Mp. Aragatnaşyk üçin 2G/3G/4G, Dual SIM, Wi-Fi 5 we Bluetooth 5.3 üpjün edilýär. Operasion ulgamy – Android 14-e esaslanýan HyperOS. Planşet IP53 standartyna laýyklykda çyglylykdan we tozandan goraýan plastmassa korpus we Dolby Atmos goldawy bolan goşa stereodinamika bilen enjamlaşdyrylandyr.
4+128 GB wersiýasy gara, açyk gök we ýaşyl reňklerde, 4+64 GB modeli diňe gara we gök reňklerde elýeterlidir.
Planşet 2-nji awgustda satuwa çykarylar, Hindistanda onuň deslapky sargytlary başlandy. 4+64GB modeliň bahasy 10,999 rupiý (131 dollar), 4+128GB wersiýasynyň bahasy 11,999 rupiý (143 dollar).
