ABŞ-da möwsümden öňki syýahatyň çäklerinde Angliýanyň premýer-ligasynyň häzirki çempiony “Mançester Siti” 2024/25 möwsümi üçin oýun eşiginiň üçünji toplumyny tanyşdyrdy. Puma brendi tarapyndan döredilen üçünji eşik hemaýatkärleriň altyn logotipleri we klubuň nyşany bilen iki öwüşginli goýy gyzyl reňkde ýerine ýetirilen.
Tanyşdyrylyş Nýu-Ýorkda improwizirlenen meýdançada geçirildi, bu ýerde janköýerler üçin DJ çykyşlary, futbol fristaýly, basketbol bäsleşikleri we beýleki güýmenjeler gurnaldy. Çärä Erling Holand, Jek Griliş we baş tälimçi Pep Gwardiola gatnaşdy.
2017-18 möwsüminden bäri ilkinji gezek “Siti” 1950-nji we 1960-njy ýyllarda asman gök reňkine alternatiwa hökmünde ulanylan nusgawy goýy gyzyl reňke gaýdyp geldi. Köýnekçäni “Sitiniň” nyşanynda şekillendirilen gäminiň ýelkenini ýada salýan abstrakt nagyş bezeýär. Belläp geçsek, klubuň nyşanynda gämi ilkinji gezek 1960-njy ýylda peýda boldy we Mançester şäheriniň tugrasyndan nusga alyndy. Bu element klubuň öz watanynda hem Ýewropada titul we kubok gazanmak üçin irginsiz hereketini alamatlandyrýar.
Mançesteriň ýene bir kluby we “Sitiniň” garşydaşy – “Mançester Ýunaýted”, öz gezeginde, resmi saýtynda 2024/2025 möwsümi üçin ikinji eşik toplumyny hödürledi.
“Şu gün adidas 2024/2025 möwsümi üçin “Mançester Ýunaýtediň” öýi hasaplaýan şäheriniň hormatyna M harpy görnüşindäki relýef surat bilen bezelen täze çykyş formasyny hödürleýär.
Gara-gök esasyň üstünden gaýtalanýan tegelek nagyşlar görnüşinde ýerine ýetirilen şa gök reňkli tekstura elementi 30 ýyl mundan ozal “Mançester Ýunaýted” eşiginde görmek mümkin bolan 3D monogrammalara sarpany aňladýar.
Şeýle-de, dizaýn “Mançester Ýunaýted” üçin “Arzuw teatrynyň” şäher bilen duşuşýan ýeri hökmünde aýratyn ähmiýete eýe bolan Mançesterden geçýän üç derýa – Irk, Medlok we Iruell derýalaryna sarpa goýýar” – diýlip, klubuň beýanynda aýdylýar.
