Parižde XXXIII tomusky Olimpiýa oýunlarynyň açylyş dabarasy geçirildi. Oňa 206 ýurtdan 10,5 müň türgen gatnaşdy. Açylyşa 300 müň töweregi tomaşaçy syn etdi. Dabara Fransiýanyň milli ýygyndysynyň öňki futbolçysy we “Altyn topuň” eýesi Zinedin Zidanyň Parižden Olimpiýa alawy bilen ylgaýşyny görkezýän wideodan başlady.
Şondan soň Olimpiada gatnaşyjy ýygyndylaryň wekiliýetleri Sena derýasynyň üsti bilen Austerlisden Ýena köprüsine çenli ýüzdüler. Dabaranyň açylyşy adaty görnüşde bolmady, ol stadionda däl-de, Parižiň ähli ýerinde geçirildi. Ýaýlymda görkeziliş şeýle mowzuklara bölündi: “Erkinlik”, “Deňlik”, “Doganlyk”, “Uýalyk”, “Sport ussatlygy”, “Baýramçylyk” we “Raýdaşlyk.
Dabaranyň dowamynda tomaşaçylar dürli şüweleňlere, aýdym-saz çykyşlaryna, moda görkezişine, opera ýerine ýetirilişine we hatda kabare stilinde tans belgisine tomaşa etdiler. Dabara gatnaşyjylaryň arasynda Lebron Jeýms, Rafael Nadal we Serena Uilýams ýaly sport ýyldyzlary, şeýle-de artisler, şol sanda Gojira topary, aýdymçylar Aýa Nakamura we Ledi Gaga bardy.
Dabara Türkmenistanyň Olimpiýa ýygyndysy hem gatnaşdy. Biziň ýygyndymyzyň baýdak göterijisi dzýudoçy – ýurdumyzyň taryhynda ilkinji “Uly tuwulga” çempiony Serdar Rahymow boldy.
Dabaranyň ahyrynda Olimpiýa çempionlary Teddi Riner we Mari-Žoze Perek Olimpiýa alawyny ýakdy – ol howa şary bilen Parižiň üstünden asmana göterildi. Şondan soň Selin Dion Edit Piafyň “L’Hymne a l’amour” aýdymyny ýerine ýetirdi.
Fransiýanyň Prezidenti Emmanuel Makron oýunlary açyk diýip yglan etdi.
