G7 ýurtlary (Kanada, Fransiýa, Germaniýa, Italiýa, Ýaponiýa, Angliýa we ABŞ) Merkezi Aziýanyň infrastruktura taslamalaryna 200 milliard dollara çenli maýa goýmagy meýilleşdirýärler. Bu barada ABŞ-nyň Global infrastruktura we maýa goýumlary boýunça hyzmatdaşlyk maksatnamasynyň ýörite utgaşdyryjysy Helaina Matsa habar berýär diýip, Gazagystanyň Daşary işler ministrliginiň metbugat gullugy ýazýar.
Matsa dünýäde azyk we energiýa howpsuzlygyny üpjün etmek üçin üpjünçilik zynjyrlaryny diwersifikasiýa etmegi öz içine alýan hyzmatdaşlyk maksatnamasy barada aýdyp berdi. Maksatnamanyň çäginde G7 ýurtlary 2027-nji ýyla çenli ösýän ýurtlara 600 milliard dollar maýa goýmagy meýilleşdirýär, onuň 200 milliard dollary Merkezi Aziýa degişlidir.
Şeýle hem maksatnamanyň çäginde ABŞ-nyň Gazagystanyň transport we logistika, arassa energiýa önümçiligi, oba hojalyk, seýrek toprak metallaryny gazyp almak we gaýtadan işlemek pudaklaryna maýa goýmagy meýilleşdirýändigi bellenip geçilýär.
