Italiýanyň “Inter” futbol kluby toparyň 2024/2025 möwsüminde geýjek täze "öý" oýun eşik toplumyny hödürledi. Nike formasynyň dizaýny nusgawy dik zolaklary döwrebap, dinamiki bezeg bilen birleşdirýär.
Futbolkada “neradzurri” diýlip atlandyrylýan klubuň däp bolan gök we gara reňkleri bar, ýöne indi dik zolaklaryň gapdalynda çep tarapda diagonal zolaklar ýerleşýär.
Esasy tapawut klubuň tugrasy: ol altynsöw reňkde ýerine ýetirilip, futbolkanyň merkezine geçirildi. Onuň ýokarsynda “Interiň” 20 çempionlyk titulyny alamatlandyrýan iki ýyldyz bar.
Klubuň metbugat gullugynyň beýanatynda: “Olar biziň arzuwymyzda ýaşaýardy, indi tenimizde ýaşarlar. Täze kynçylyklara tarap ymtylýarys, geljegi döredýäris. Ýyldyzlar. Bu başlangyç "- diýilýär.
Futbolkanyň içinde şäheriň tugrasy, Milanyň nyşany bolan Biscione ýylanynyň şekili bar.
Şeýle hem, eşikde klubuň täze hemaýatkäri Betsson Sport-yň logotipi bar. Eşigiň ýany bilen gara şorty we getralar gelýär.
“Inter” 2023/2024 möwsümini A seriýasynda birinji orunda 38 oýunda 94 utuk toplamak bilen jemledi. Topar Italiýanyň Super Kubogyny hem aldy. “Inter” täze möwsümiň ilkinji oýnuny 17-nji awgustda “Jenoa” bilen oýnar.
