AIW-niň ýaş zenanlaryň arasynda giň ýaýran ýurtlary bolan Günorta Afrikada we Ugandada bu keseliň öňüni alýan täze dermanyň - lenakapawiriň kliniki synaglary tamamlandy. Amerikanyň Gilead Sciences biofarmakologiki barlag kompaniýasynyň metbugat beýanatyna görä, synaglar dermanyň ýokary netijelidigi sebäpli ir togtadyldy.
Barlaga 16-25 ýaş aralygyndaky 5300-den gowrak zenan gatnaşdy. Toparlaryň birinde näsaglara lenakapawir, beýlekisinde - wirusa garşy başga dermanlar - Descovy we Truvada sanjyldy.
Bir ýyllap dowam eden barlagyň ahyrynda lenakapawir alýan 2 134 zenanyň hiç birine AIW ýokuşmady. Descovy we Truvada ulanylan toparlarda netije beýle bir öwerlik bolmady: birinji derman serişdesi sanjylan adamlaryň arasyndan 16-syna, ikinjisi sanjylanlaryň içinden bolsa 39 adama kesel ýokuşdy.
Lanekapawir sanjymly derman bolup, ol ýylda diňe iki gezek urulmaly. AIW-niň netijesi yzygiderli ulanylyşyna bagly bolan öňüni alyş tabletkalaryndan tapawutlylykda, sanjym has durnukly goragy üpjün edýär.
Netijäniň gowudygyna garamazdan, lenakapawiriň kliniki synaglary dowam edýär. Häzirki wagtda bu derman AIW ýokanjyny toplumlaýyn bejermekde ulanmak üçin FDA tarapyndan tassyklandy, ýöne öňüni almakda ulanmak heniz tassyklanmady.
Bu tapgyrda hemmeleriň derman satyn alyp bilmejekdigini bellemelidiris: bejerginiň ilkinji ýylynda sanjymlar näsaglara 42 müň dollara düşer, geljekde bahasy 39 müň dollara çenli arzanlar, emma bu henizem gaty gymmat düşýän bejergiligine galar. Öndüriji kompaniýa, lenakapawiriň geljekki barlaglarynyň netijeleri belli bolanda, bahany ondanam arzanlatmagy wada berýär.
