zzTürkmenistanyň futbol boýunça milli ýygyndysy Aziýa Kubogy-2027-niň saýlama tapgyrynyň bäşinji duşuşygynda Hytaý Taýpeýinden üstün çykdy. Duşuşyk 18-nji noýabrda Arkadag şäheriniň stadionynda geçip, 3:1 hasabynda tamamlandy.
Türkmen futbolçylary duşuşygyň 13-nji minutynda Rahman Myratberdiýewiň goly bilen hasaby açdylar, topy Rasul Çaryýew asist etdi. Myhmanlar arakesmeden öň hasaby deňlediler, Anž Kuame tapawutlandy (45'). Ikinji ýarymyň başynda, 53-nji minutda Elman Tagaýew topary ýene öňe çykardy. Duşuşygyň gutarnykly hasabyny 79-njy minutda Meýlis Diniýew goýdy, oňa hem Rasul Çaryýew asist etdi.
Toparyň beýleki duşuşygynda Tailandyň ýygyndysy myhmançylykda Şri-Lankanyň toparyndan uly hasap bilen - 4:0 ýeňiş gazandy.
Hytaý Taýpeýini ýeňmek bilen Türkmenistan 12 utuk toplap, D toparda öňdebaryjylygyny saklaýar. Tailandyň hem 12 utugy bar, ýöne özara oýunda yza galýar. Şri-Lanka 6 utuk toplady. Hytaý Taýpeý bolsa utuksyz galýar.
Türkmenistanyň ýygyndysy saýlama tapgyryň iň soňky duşuşygyny 2026-njy ýylyň 31-nji martynda myhmançylykda Tailandyň toparyna garşy geçirer. Röwşen Meredowyň ýolbaşçylygyndaky topara Aziýa Kubogy-2027-e saýlanmak üçin deňme-deň netije hem ýeterlik bolar.
