Azerbaýjanyň “Turan” futbol klubunyň kapitany Şahriýar Aliýew Azerisport.com habarlar çeşmesi bilen geljekki möwsüm barada pikirlerini paýlaşdy. Ol toparyň baş tälimçi Gurban Berdiýewiň girizýän täze taktikasyna uýgunlaşmagyň ugrundadygyny belledi.
Öň, türgenleşik ýygnanyşygy wagtynda geçirilen ýoldaşlyk oýunlarynda Towuzdan bolan klub “Şamkiri” (13:0) we “Kýapazy” (4:0) uly hasap bilen utdy.
“Ýoldaşlyk oýunlarynda ýeňiş gazanyldymy, ol ulumy ýa-da ýok, bu möhüm däl. Biz baş tälimçiniň görkezmelerini ýerine ýetirmäge çalyşýarys. Bu iň esasy zat. Biz agyr türgenleşikler sebäpli oýna ýadaw halda çykdyk. Şeýle ýagdaýda ýalňyşlyklara ýol berilýär we biz olary görýäris. Gurban Berdiýew her bir oýny, her bir türgenleşigi seljerýär, bize gowşak we güýçli taraplarymyzy görkezýär, ýumuş tabşyrýar. Ýene bir gezek gaýtalasak, şeýle oýunlarda hasabyň ähmiýeti ýok” diýip, Aliýew belledi.
Futbolçynyň aýtmagyna görä, Berdiýew täze taktikany ornaşdyrýar.
“Onuň öz filosofiýasy bar we bizden şoňa laýyk oýnamagymyzy talap edýär <…> Her tälimçiniň öz stili bar. Her türgenleşikden we oýundan soň Gurban Berdiýew seljerme geçirýär, düşünmedik zadymyzy düşündirýär. Ol hemişe bize nämedir bir zada düşünmesek sorag bermelidigimizi aýdýar. Ýene-de düşündirýär – hem türgenleşikde, hem ýygnakda. Biz her gün ýygnak geçirýäris diýseň hem bolar” diýip, kapitan aýdýar.
Aliýew tälimçiniň oýunçylaryň her biri bilen gürleşip bilýändigini belleýär.
“Ol futbolçylaryň arasynda tapawut goýmaýar, hemmelere deň garaýar. Her oýunçy bilen gürleşýär. Futbolçylar bilen bire-bir duşuşýan wagtlary hem bolýar. Ol futbol ylmy we başga-da köp zatlar barada gürrüň berýär. Iň esasy zat, ol gowy topar döretdi” diýip, ol gürrüň berýär. Kapitan toparyň tälimçiniň görkezmelerini doly ýerine ýetirip biljekdigine ynanýar.
“Turanyň” geljekki möwsümdäki maksatlary barada aýdyp, Aliýew möwsümiň jemi boýunça ýewrokuboklara ýollama almaga umyt edýändigini belledi.
Bellenilişi ýaly, ýakyn günlerde Gurban Berdiýewiň topary has abraýly garşydaşlar bilen oýunda güýjüni synap görer. “Turan” Türkiýäniň Super ligasynyň kluby “Adana Demirspor” (22-nji iýul), şeýle-de Türkiýäniň birinji ligasynyň iki wekili – “Pendikspor” (18-nji iýul) we “Kojaelispor” (25-nji iýul) bilen oýnar.
