Argentinanyň milli ýygyndysynyň hüjümçisi Lionel Messi Amerikanyň Kubogynda gazanylan ýeňişden soň topardaşlaryna sowgat berdi. Ýatlap geçsek, ýaryşyň aýgytly oýnunda Argentina topary goşmaça wagtda Kolumbiýany 1:0 hasabynda utdy.
Messi oýunçylara Argentinanyň ýygyndysynyň formasynyň we baýdagynyň reňklerine laýyk dizaýnda bezelen nauşnikleri sowgat etdi. Bu barada toparyň futbolçysy Alehandro Garnaçonyň dogany Roberto Garnaço habar berdi.
Messiniň özi oýnuň dowamynda şikes alyp, 66-njy minutda meýdançadan çykdy.
Argentina Kopanyň taryhynda iň köp titully topar boldy. Onuň hasabynda 16 titul bar. Ikinji orny Urugwaýyň ýygyndysy eýeleýär – 15 ýeňiş. Üçlügi 9 titul bilen Braziliýa topary jemleýär.
