Lionel Messi Amerikanyň Kubogy – 2024-de Argentinanyň milli ýygyndysy ýeňiş gazanandan soň taryhda iň köp titully oýunçy boldy. Indi 37 ýaşly hüjümçiniň hasabynda 45 kubok bar.
Bu görkeziji boýunça ol braziliýaly goragçy, “Barselona” boýunça öňki klubdaşy Dani Alwesden öňe geçdi. Onuň hasabynda 44 titul bar.
Üçlügi tutuş karýerasynyň dowamynda “Al-Ahlide” çykyş eden müsürli ýarym goragçy Hossam Aşur jemleýär – 39 kubok.
2023-nji ýylyň iýul aýyndan bäri Messi “Inter Maýamide” çykyş edýär, oňa “PSŽ-den” erkin agent hökmünde geçdi.
Ol Amerikanyň Kubogy – 2024-de dört oýna gatnaşyp, bir gol geçirdi we bir netijeli geçirim etdi. Argentinalylar finalda Kolumbiýanyň toparyny 1:0 hasabynda utdular (goşmaça wagt).
