Türkmenistanda ABŞ-nyň 45-nji Prezidenti Donald Trampyň janyna howp salynmagy bilen baglanyşykly habar uly howatyrlanma bilen kabul edildi. Türkmenistanyň Daşary işler ministrliginiň 14-nji iýulda ýaýradan beýanatynda belleýşi ýaly "türkmen tarapy güýç ulanmak boýunça bu hereketi aýgytly ýazgarýar we Donald Trampa tiz wagtda sagalmagyny arzuw edýär".
"Türkmenistan terrorçylygyň ähli görnüşleriniň ýüze çykmasyna we jemgyýetde dartgynlygy döredýän syýasy süteme garşy göreşmek boýunça halkara tagallalarynyň işjeň gatnaşyjysy bolup çykyş edýär" - diýlip habarda aýdylýar.
Şenbe güni ABŞ-nyň 45-nji Prezidenti Donald Tramp Pensilwaniýa ştatynda Batler şäherinde saýlawçylar bilen duşuşygynyň barşynda atylan ok netijesinde gulagyndan şikes aldy. Syýasatça ot açan adam ABŞ-nyň howpsuzlyk gulluklary tarapyndan ýok edildi. Atyşyk netijesinde bir adam - 50 ýaşly ýangyn söndüriji Kori Komperator aradan çykdy. Ýene-de iki sany tomaşaçy şikes aldy.
ABŞ-nyň Prezidenti Jo Baýden Trampyň tiz wagtda sagalmagyna umyt baglady.
Maglumatlara görä, ot açan adam Pensilwaniýanyň 20 ýaşly ýaşaýjysy Tomas Mettýu Kruks eken. Onuň bu hereketiniň sebäpleri derňelýär.
