2023-nji ýylyň başynda hakerler OpenAI-niň içerki aragatnaşyk ulgamyna girip, emeli aňyň ösüşi bilen baglanyşykly maglumatlary ogurladylar. Kompaniýa hiç bir müşderiniň ýa-da hyzmatdaşyň maglumatlarynyň bozulmandygyny aýdyp, hakerleriň ulgama aralaşandygy barada habary ýaýratmazlyk kararyna geldi. Bu barada habarly çeşmelere salgylanýan The New York Times habar berdi.
Kompaniýa Business Insider-e ulgamyň döwülmegine sebäp bolan “esasy howpsuzlyk meselesini anyklady we aradan aýyrdy” diýse-de, bu waka OpenAI-iň içinde-de, onuň töwereginde hem biynjalyklyk döretdi. Kompaniýanyň işgärleri howpsuzlygyň derejesi babatda aladalanyp, daşarky howplardan, şol sanda döwlet aktorlaryndan goramak üçin onuň ýeterlik däldigini nygtadylar.
OpenAI-niň direktorlar geňeşiniň öňki agzasy Leopold Aşenbrenner aprel aýynda "howpsuzlyk düzgünleriniň düýpli bozulýandygy" baradaky meseläni gozgandan soň, özüniň işden çykarylandygyny aýtdy. OpenAI-niň özi bolsa onuň şu sebäpden işinden aýrylandygyny inkär edýär.
Birnäçe esasy işgär işden çykarylandan soň, kompaniýanyň ygtybarly AI tehnologiýalaryny işläp taýýarlamaga gönükdirilen “super deňleşdiriş” toparyny hakykatda dargadandygy habar berilýär.
Şonda OpenAI-ny esaslandyryjylaryň biri we esasy hünärmen Ilýa Suskewer hem topardan çykypdy. Ol OpenAI-nyň baş direktory Sem Altmanyň, tehnologiýanyň howpsuzlygy meselesinde aralaryndaky düşünişmezlikler sebäpli, işden gitmegini guramaga edilen başa barmadyk synanyşykdan alty aý soň, işden gidýändigini habar beripdi. Iýun aýynda Suskewer öz hususy AI başlangyjyny döredendigini yglan etdi – onuň esasy maksady täjirçilik basyşyna garaşsyz, howpsuz we güýçli emeli aňy ösdürmek bolar.
Häzirki ýagdaýa jogap edip, OpenAI-nyň täze howpsuzlyk we gorag komitetini döredendigi bellendi. Oňa Milli howpsuzlyk agentliginiň öňki müdiri, ABŞ-nyň kiber serkerdeliginiň (Goranmak ministrliginiň kiberhowpsuzlyk bölümi) öňki başlygy Pol Nakasone ýolbaşçy boldy.
