“Mersedes” toparynyň britaniýaly sürüjisi Lýuis Hemilton “Formula-1” klasyndaky awtoýaryşlar boýunça dünýä çempionatynyň 12-nji tapgyry bolan Beýik Britaniýanyň Gran-prisinde ýeňiş gazandy. Ýaryş “Silwerstoun” awtodromynda geçirildi.
Ikinji orny “Red Bulldan” Maks Werstappen eýeledi. Üçlügi “Maklareniň” ýaryşa gatnaşyjysy Lando Norris jemledi.
Bu ýeňiş Hemilton üçin 2021-nji ýyldan bäri dünýä çempionatynyň tapgyrlarynda ilkinji ýeňiş boldy. Soňky gezek ol 2021-nji ýylyň dekabr aýynda Saud Arabystanynyň Gran-prisinde birinji orny eýeläpdi.
Hemilton “Silwerstounda” dokuzynjy ýeňşini gazandy, bu ýaryş ýolunyň rekordydyr. Şeýle-de, Hemilton dünýä çempionatynyň bir tapgyrynda gazanan ýeňişleriniň sany boýunça germaniýaly Mihael Şumaherden öňe geçip, arassa birinji orna çykdy. Şumaheriň hasabynda Fransiýadaky tapgyrda sekiz ýeňiş bar. Hemilton Wengriýanyň Gran-prisiniň hem sekiz gezek ýeňijisi boldy.
Şahsy sanawda Werstappen öňdeligi saklaýar (255 utuk), ikinji orunda Norris (171), üçünji orunda “Ferrariden” Şarl Lekler (150) gelýär. Konstruktorlaryň kubogynda öňdebaryjy “Red Bull” (373) bolup, onuň yzyndan “Ferrari” (302) we “Maklaren” (295) gelýär.
Dünýä çempionatynyň 13-nji tapgyry 19 – 21-nji iýulda Wengriýada geçiriler.
