Urugwaýyň milli ýygyndysy futbol boýunça Amerikanyň Kubogynyň 1/4 finalynda Braziliýanyň toparyndan penalti tapgyrynda üstün çykdy.
Paradaýsda geçirilen oýnuň esasy wagty 0:0 hasabynda tamamlandy. Oýundan soňky penalti tapgyrynda urugwaýlylar has takyk boldy – 4:2.
Braziliýalylardan Eder Militaonyň we Duglas Luisiň gol geçirmek synanyşyklary başa barmady.
Belläp geçsek, Urugwaý 74-nji minutdan Naitan Nandes oýundan çykarylandan soň azlykda oýnady. Braziliýalylardan diskwalifikasiýa sebäpli Winisius Žunior oýny sypdyrdy.
Beýleki bir çärýek final oýnunda kolumbiýalylar Panama toparyny uly hasap bilen utdular – 5:0. Gol bilen Kordoba (8), Hames Rodriges (15, pen.), Luis Dias (41), Rios (70) we Borha (90+5, pen.) tapawutlandy.
Indi Urugwaý bilen Kolumbiýanyň arasyndaky ýarym final oýny 10-njy iýuldan 11-nji iýula geçilýän gije bolar we Aşgabat wagty bilen sagat 05:00-da başlar. Beýleki bir ýarym finalda Argentina topary Kanada bilen duşuşar. Oýun 9-njy iýuldan 10-njy iýula geçilýän gije bolup, Aşgabat wagty bilen sagat 05:00-da başlar.
Üçünji orun üçin oýun 14-nji iýulda Şarlottda bolar, final Maýami Gardensdäki “Hard Rok Stedium” meýdançasynda geçiriler.
