Türkiýäniň parlamenti raýat awiasiýasy baradaky kanuna düzedişleri kabul etdi, ol howa menzillerinde ýolagçylary barlamagyň berk düzgünlerini girizýär diýip, Habertürk teleýaýlymy habar berdi.
Täze düzgünler Çikago konwensiýasynyň kadalaryna laýyk getirilmäge gönükdirilendir. Howpsuzlyk gullugynyň işgärleriniň indi hem terminala girilende, hem uçara münme zonasyna girilende ýolagçylaryň goşlaryny barlamaga hukuklary bar. Bu diňe bir şahsy goş-golamlara däl, eýsem elektron gurluşlara-da degişlidir. Barlagdan ýüz öwren ýolagçylar howa menziline ýa-da uçuş zonasyna goýberilmez.
Äkitmek üçin gadagan edilen predmetler şol ýerde konfiskasiýa ediler.
Türkiýäniň iri howa menzillerinde iki barlag punkty göz öňünde tutulan: umumy elýeterli zonalaryň girelgesinde we uçuş üçin hasaba alyşdan soň.
Şeýle-de, düzedişler uçaryň bortunda düzgün bozulmalar üçin jerimeleri kesgitleýär: hukuk bozulmalary barada habar bermedik ekipaž üçin 620 dollardan 15,6 müň dollara çenli. Kwadrokopteriň rugsatsyz ýa-da raýat awiasiýasy edarasy tarapyndan rugsat berlen zonalardan daşary uçurylandygy üçin operator, takmynan, 1,8 müň dollar möçberde jerime tölemeli bolar.
