Linkolnşiriň (Angliýa) ýaşaýjysy Jill Stýuart öýüniň üçeginde Roždestwo bezeglerini gözläp, “döwlen farfor” ýazgyly gutynyň üstünden barýar. Guty oňa 20 ýyl ozal atasyndan galypdyr diýip, Guardian habar berýär.
Gyzyň merhum atasy XX asyryň başlarynda Hytaýda gulluk edeninde farfor ýygnapdyr. Wagtyň geçmegi bilen käbir predmetler zaýalanypdyr. Ilkibaşda Jill tapyndyny zyňmak isleýär, ýöne ony auksion öýüne görkezmek kararyna gelýär. Auksionçylar kolleksiýanyň gymmatlygyna haýran galýarlar, ahyrky satuw mukdary tas 197 müň funt sterlinge ýetýär.
Auksionçy Jeýms Lawerakyň aýtmagyna görä, hytaý farforyna bolan isleg garaşylandan has ýokarydy.
Kolleksiýa lotlara bölündi. Sin neberesinden (XVII-XVIII asyryň aralygy) manjur imperatory Kansiniň döwründäki seýrek çaşkalary öz içine alýan 16 farfor predmetli lot £50-100 diýlip bahalandyryldy, ýöne £59 müňe satyldy.
Ýelimlenen böleklerden düzülen başga bir lota £100 baha kesildi, ýöne £5 müňe satyldy.
Lawerak hatda zaýalanan predmetleriň hem uly isleg döredendigini, munuň bolsa tutuş kolleksiýanyň seýrekdigini we gymmatlydygyny görkezýändigini belledi.
Netijede, Jilliň satuwdan gazanan girdejisi 160 000 funt sterlinge barabar boldy.
