Fransiýa Belgiýa bilen duşuşygynda belgiýalylaryň goragçysy Ýan Wertongeniň öz derwezesine geçiren goly netijesinde 1:0 hasabynda ýeňiş gazandy.
Bu häzirki Ýewropa çempionatynda eýýäm dokuzynjy awtogoldur. Geçen Ýewro ýaryşynda goýlan rekorda ýene iki gol galdy – şonda 11 awtogol bolupdy.
Häzirki ýaryşda Fransiýanyň milli ýygyndysynyň hasabynda oýunda girizilen gol ýok. Ýöne bu oňa dörtden bir finala çykmaga päsgel bermedi. Toparlaýyn tapgyrda fransiýalylar Niderlandlar bilen deňme-deň oýnadylar (0:0), Awstriýany awtogoluň netijesinde utdular (1:0) we Polşa bilen deňme-deň oýnadylar (1:1), bu oýunda Kilian Mbappe penaltiden gol girizdi.
Dörtden bir finalda fransiýalylar penalti tapgyrynda Sloweniýany utan Portugaliýanyň milli ýygyndysy bilen oýnarlar. Oýnuň esasy we goşmaça wagty hasap açylmazdan tamamlandy. Birinji goşmaça wagtyň ahyrynda portugaliýalylar penalti gazandylar, ýöne Kriştianu Ronaldunyň urgusyny derwezeban Ýan Oblak yzyna gaýtardy.
Penalti tapgyrynda Portugaliýa toparynyň derwezebany Diogu Koşta sloweniýalylaryň üç urgusyny-da yzyna gaýtarmagy başardy, portugaliýalylar bolsa üç gezek gol geçirdiler (şol sanda Ronaldu).
Şeýlelik bilen, Koşta Ýewropa çempionatynyň iki rekordyny goýdy – ol ýaryşyň taryhynda oýundan soňky penalti tapgyrynda gol sypdyrmadyk, şeýle-de penalti tapgyrynda üç urgyny gaýtaran ilkinji derwezeban boldy.
Şu gün Ýewro ýaryşynda 1/8 finalyň soňky iki oýny bolar – Rumyniýa Niderlandlar, Awstriýa Türkiýe bilen oýnar.
