29-njy iýunda günüň ikinji ýarymynda Arkadag şäheriniň häkimliginiň mejlisler zalynda şäheriň açylmagynyň bir ýyllygy mynasybetli baýramçylyk maslahaty geçirildi. Forumyň dowamynda asman giňişligindäki ýyldyzlaryň birine «Arkadag» diýip at goýlandygy barada habar berildi. Bu barada Asman jisimlerini öwrenýän «Kosmos-Ýer» jemgyýetiniň alymlary habar berdi.
Bellenilişi ýaly, watandaşlarymyzy ýyldyz baradaky maglumat bilen tanyşdyrmak maksady bilen, asman jisimine «Arkadag» adynyň dakylandygyny tassyklaýan güwänamany, şeýle hem teleskopy we onuň düşüren suratlaryny ýurdumyzyň abraýly ýokary okuw mekdepleriniň biri bolan Magtymguly adyndaky Türkmen döwlet uniwersitetine gowşurmak barada çözgüt kabul edildi.
Dabara gatnaşyjylar ähli bilim işgärlerini, uniwersitetiň professor-mugallymlaryny hem-de talyplaryny bu ajaýyp waka bilen gutladylar, degişli güwänama gowşuryldy.
