Bawariýada (Germaniýa) arheologlar gadymy Rim sandalynyň galyndylaryny tapdylar. Bawariýanyň ýadygärlikleri goramak boýunça döwlet edarasynyň habaryna görä, butsynyň ýaşy 2000 ýyl töweregi.
Tapyndy Oberştimm şäheriniň golaýyndaky gadymy Rimiň harby galasynyň golaýyndaky raýat şäherçesinde geçirilen gazuw-agtaryş işleri mahalynda tapyldy. Bu şäherçe b.e. 60-130-njy ýyllar aralygynda esaslandyrylypdyr.
Aýakgap deriden tikilen bolup, diňe dabany we birnäçe çişi galypdyr. Rentgen seljermesi munuň rim legionerleriniň geýen, aşagy çişli, berk, kaligi diýilýän sandalydygyny görkezdi. Çişler ýere ykjam ilteşip, nätekiz ýerlerden ýörelende dabany gorapdyr. Şotlandiýanyň Trimontium Museum-iniň hünärmenleri şeýle aýakgaplaryň aýagy gabarçaklamakdan we “garym dabany” diýlip atlandyrylýan keselden goraýandygyny bellediler (“aşa çygly howa şertlerinde aýagyň uzak wagtlap sowukda saklanmagy” netijesinde dabana zeper ýetmegi).
Gyzykly tarapy, butsy, aýratynam Germaniýada Ýewropanyň Futbol çempionatynyň geçýän döwründe, häzirki zamanyň aşagy çişli futbol aýakgaplaryna (şipowkalara) çalymdaşdy.
Bawariýanyň ýadygärlikleri goramak boýunça müdirliginiň wekiliniň sözlerine görä, tapyndy ýerli ilatyň gadymy rimlileriň däp-dessurlaryny, şol sanda egin-eşiklerini kabul edendigini görkezýär.
B.e. I asyrynyň ahyrynda Rim goşuny “kalseý” diýlip atlandyrylýan ýapyk ädiklere geçmek bilen, kaliglerden ýüz öwürdi.
