Oksford uniwersitetiniň Reýter žurnalistikany öwreniş institutynyň (Reuters Institute) täze gözleglerine görä, täzeliklere bolan gyzyklanma bütin dünýäde kemelýär. Köp adam olary içgysgynç ýa-da gynandyryjy hasaplaýar diýip, Bi-bi-si habar berýär.
47 ýurtdan 95 000 adamyň gatnaşmagynda geçirilen pikir soraşmada oňa gatnaşanlaryň diňe 46%-iniň habarlary ünsli yzarlaýandygy, ýagny olaryň 2017-nji ýyldaky 63%-den pesdigi anyklandy.
Şol bir wagtyň özünde, habarlardan bilgeşleýin gaça durýan adamlaryň paýy ýedi ýylda 29%-den 39%-e çenli artdy. Habarlardan gaça durmak meýli iň ýokary derejede diýip hasabatda bellenýär.
Barlagyň awtorlary muny COVID-19 pandemiýasy we harby gapma-garşylyklar bilen birlikde, soňky ýyllaryň “çylşyrymly habar meýilnamasy” bilen baglanyşdyrýarlar.
Hasabatyň esasy awtory Nik Nýuman: "Habarlary ýigrenmek - adamlara akyl saglygyňy goramak ýa-da durmuşyňy dowam etdirmek üçin zerur tebigy reaksiýa" – diýip belledi.
Şeýle hem, barlagyň hasabatynda soňky onýyllykda telewideniýe we neşirler ýaly, adaty habar beriş serişdeleriniň tomaşaçylarynyň we okyjylarynyň ep-esli azalandygy aýdylýar. Ýaşlar täzelikleri internetden we sosial ulgamlardan bilenlerini has gowy görýärler.
Şol bir wagtyň özünde, Facebook, kem-kemden meşhurlygyny ýitirýän hem bolsa, dünýäde täzelikleri bilmegiň esasy platformasy bolmagynda galýar. Beýleki meşhur maglumat çeşmelerine indi YouTube, WhatsApp we TikTok girýär.
Esasanam soňkusy 18-24 ýaş aralygyndaky ýaşlaryň 23% -iniň täzelikleri bilýän esasy çeşmesi hökmünde gülläp ösýär. Sebäbi TikTok-yň formaty bolan gysga wideolar habarlar bilen tanyşmagyň has meşhur usulyna öwrülýär.
