21-nji iýunda futbol boýunça Ýewropa çempionatynyň toparlaýyn tapgyrynyň ikinji duşuşyklary geçirildi: Ukraina Slowakiýa bilen, Polşa Awstriýa bilen, Fransiýa bolsa Niderlandlar bilen oýnady.
E toparda Ukraina Slowakiýadan üstün çykdy. Dýusseldorfda geçirilen duşuşyk 2:1 hasabynda tamamlandy.
Slowakiýalylardan Iwan Şransyň 17-nji minutda geçiren golundan soň, ukrainalylar 54-nji minutda Nikolaý Şaparenkonyň goly bilen hasaby deňlediler. Roman Ýaremçuk bolsa 80-nji minutda ýeňiş goluny geçirdi.
Birinji oýnunda Ukraina Rumyniýadan 0:3 utulypdy, Slowakiýa bolsa Belgiýany utdy (1:0). Netijede E toparda 3 ýygyndyda 3 utukdan bar - Rumyniýada, Slowakiýada we Ukrainada. Belgiýada häzirlikçe 0 utuk bar. Ol ikinji oýnuny şu gün Rumyniýa garşy geçirer. Duşuşyk ýekşenbe gününe geçilýän gije bolar. Oýun Aşgabat wagty bilen 00:00-da başlanar.
D toparda Awstriýanyň milli ýygyndysy Polşadan üstün çykdy. Berlinde geçirilen duşuşyk 3:1 hasabynda tamamlandy. Awstriýadan gollary Gernot Trauner (9), Kristof Baumgartner (66) we Marko Arnautowiç (78, pen.), Polşadan Kşiştof Pýöntek (30) geçirdi.
Fransiýa - Niderlandlar duşuşygynda şu gezekki çempionatda ilkinji gezek golsuz oýun boldy - 0:0. Duşuşyk Leýpsigde geçirildi. Birinji oýnunda burnuna şikes alan Kilian Mbappe oýna çykmady.
Ikinji tapgyryň netijeleri boýunça Niderlandlar bilen Fransiýada 4 utukdan, Awstriýada 3 utukdan bar. Polşa iki oýunda hem utulyp, toparda dördünji orny eýeledi. Ol Fransiýa bilen duşuşygynyň netijesine garamazdan, ýaryşdan gaýdar.
